K OTOCH

Je'el ku káajal túun u k'uchul le meyajo'obo'. Te'el k'iina' táan k káajal yéetel jump'éel ts'íib ku túuxtik Feliciano Sanchez Chan. Leti'e' juntúul máak táaj uts tu yich u ts'íib ich maaya, ku ka'ansik bix u beeta'al jats'uts ts'íibo'ob, yéetel u ts'aamaj u yóol tia'al u mu'uk'a'ankuusa'al miatsil maaya wíinik. ma' tu túuxtaj bix u k'aaba'i' ba'ale', ken a xoke'exe' in wa'alike' ma' k'abéet u k'aaba'i', chéen cha'a'ex u k'uchul ta puksi'ik'ale'ex.

Táan u júutul le k-otocha’ in paalale’ex.

Jump’éel k’iin

Wa tun tia’al u taal u sáastal

Wa tun tia’al u taal u chíinil k’ine’,

Ma’ in wojel máax si’ip’ u yóole’e

ka’a tu tsáank’altaj u joolnajil,

Tu cha’aj u lo’obol u táankabil,

U na’akal áak’o’ob yóok’ol u tsíikil.

In wa’alike’ min taal xan yum iik’e’

Ka’a tu walk’esaj u pakjo’olil.

Táan u júutul le k-otocha’ paalale’ex.

Wa ka’a a wile’exe’

táan u káajal u níikil u pak’lu’umil,

Ts’o’ok u chíikpajal u ch’ala’atel,

Láaj jenchaj u k’óobentuunichil,

Búut’ le x-nuk káat jach ki’ u síistal u ja’ay ka’ache’.

Táan u júutul le k-otocha’ paale’ex.

Yóok’ol u tsíikile’

junkúul j-ma’a subtal kóopo’

Ts’o’ok u chen ch’inkubáa ka’anali’.

U ch’ija’an okoy ja’ayle’

Ti’ ku pe’ekekaab lu’ume’.

Ts’uukul u chúun u yokmal

Kóots u yaak’il u jíilil,

Táan a jaanta’al u joonajil tumeen k’amas.

Táan u júutul le k-otocha’ paale’ex.

U nikte’ilo’ob,

Ku ki’ibokaankil t-kuxtal

ka’ach tia’al u taal u píik’ile’

Súuto’ob chen bini’it xíiwil.

U táankabile’,

P’áat chen x-tokoy táankab

Mina’an u p’aak’alilo’ob.

Xu’ul tuláakal che’ ku yichaankil.

Mina’an nikte’ ki’ibokaankil,

Le xíiw’o’ob ku ts’aakankile’

Chen bey u pe’ekekaabo’,

Bey ba’al mina’an u beelale’.

Le wa jayp’éel k-nu’ukulo’ob

K-k’a’abetkuunsik ka’ach

tia’al k-meyajtik k-kuxtale’

Múuko’ob ich lu’um,

Ts’úuk u yooko’ob,

Tu yiitsintuba’obe’ ka’a la’abi.

Táan u júutul le k-otocha’ paale’ex.

U ts’ook u yajile’

Mix u chíikul a pe’echak’e’ex tin wilaj

Taaliken in chan xíimbalte’ex

Tia’al in wa’alikte’ex.

In paalale’ex

Táan u júutul le k-otocha’…

Táan u láaj júutul le k-otocha’.